ماڵپه‌ری شایسته‌
سایتيكی بيلایه‌ن بؤ خزمه‌تی هه‌مووان

    ڤیدۆ: لە هەولێر 5 کەس بە چەکەوە هێرشدەکەنەسەر کافتریایەک و خاوەنەکەی بریندار دەکەن

    ڤیدۆ: لە هەولێر 5 کەس بە چەکەوە هێرشدەکەنەسەر کافتریایەک و خاوەنەکەی بریندار دەکەن


    لە هەولێر چەند کەسێک بە چەکەوە هێرشدەکەنەسەر کافتریایەک و خاوەنی کافتریاکە بە گوللە بریندار دەکەن، خاوەنی کافتریاکەش بۆ رووداو دەڵێت "داوای پارەیان لە ئێمە کرد، بەڵام لەبەرئەوەی پێمان نەدان، سێ گوللەیان بەڕووی مندا تەقاند و قاچێکم برینداربوو و بە دەمانچەش لەسەرمیاندا و بریندارییان کردم."
     
    رووداوەکە بەیانی رۆژی هەینی (23-10-2020) لە نزیک گوندی لوبنانی لە هەولێر روویداوە، بەگوتەی حەیدەر ساڵح، خاوەنی کافتریاکە ئەوانەی هێرشیان کردووەتەسەر کافتریاکە پێنج کەس بوون و "نزیکەی 7 گوللەیان تەقاندووە".
     
    حەیدەر ساڵح، خاوەنی کافتریای دیلمار لە هەولێر بە تۆڕی میدیایی رووداوی راگەیاند "بەرەبەیانی رۆژی هەینی پێنج کەس کە چواریان دەمانچە و یەکێکیان کڵاشینکۆڤی پێبوو، هاتنە ژوورەوە و داوای پارەیان کرد، ئێمە دوای ئەوەی داواکەی ئەوانمان رەتکردەوە هەڕەشەیان کرد و چەند گوللەیەکیان تەقاند و ناو کافتریاکەیان تێکدا. لەکاتی تەقکردنەکە گوللەیەک بەر قاچی من کەوت و دواتر یەکێکیان بە دەمانچە لە سەری دام و برینداری کردم."
     
    ئەو خاوەن کافتریایە ئاماژە بەوەش دەدات، کە ئەوان وەک خەڵکانی "عەشایەر" خۆیان ناساندووە و پێیانگوتین "ئەگەر لە هیچ شوێنێک باسی ئەو رووداوە بکەن خراپترتان بەسەر دێنین."
     
    لە بەشێکی دیکەی قسەکانیدا ئەو خاوەن کافتریایە رایدەگەیێنێت کە "لە چەند رۆژی رابردوودا هاتوونەتە سەر کافتریایەکی دیکەی تەنیشتیان پارە و مۆبایلیان وەرگرتووە و دواتر رۆیشتوون. بەڵام چونکە ئەوان پارەیان داوە بەهیچ شێوەیەک تەقەیان نەکردووە و یەکسەر رۆیشتوون."
     
    وەک خۆی ئاماژەی پێدا "ئەوانە کەسانی ناسراون و بە ئاشکرا و بەبێ ترس ئەو کارەیان کردووە". دەشڵێت "ئێمە لە پۆلیس و ئاسایش سکاڵای یاساییمان تۆمارکردووە و بەڵێنیان پێداوین کە بەزووترین کات ئەو کەسانە دەستگیردەکەن".
     
    حەیدەر ساڵح لەڕێگەی رووداوە داوا دەکات کە "حکومەتی هەرێمی کوردستان و لایەنە پەیوەندیدارەکان بەجیدی بێنەسەرخەت و لێکۆڵینەوەی تووند لەگەڵ ئەو کەسانەدا بکەن کە ئارامی شار دەشێوێنن و ئەو کارانە دەکەن." 
     
    دەشڵێت " لەگەڵ بەڕێز دلێر نەجاڕ، بەڕێوەبەری پۆلیسی هەولێر قسەیان کردووە و گوتویەتی کە دەستیان بە لێکۆڵینەوە لە رووداوەکە کردووە و بەڵێنی پێداوین کە بەزووترین کات هێرشکاران دەستگیردەکەن."
     
    لە ڤیدیۆکەدا کە بڵاوکراوەتەوە و دەست رووداو کەوتووە " دەردەوکەوێت کە چەند کەسێک بەچەکەوە دەچنە نێو کافتریاکە و دواتر کورسی و مێزەکانی نێو کافتریاکە تێکدەدەن."
     
    لە ماوەی چەند رۆژی رابردووشدا دوو کەس بە چەکەوە هێرشیان کردەسەر دەرمانخانەیەک و ڤیدیۆکەی لە تۆڕە کۆمەڵایەتییەکان بڵاوکرایەوە. دوای چەند رۆژێک لە رووداوەکە، وەزارەتی تەندروستیی هەرێمی کوردستان روونکردنەوەی لەبارەی بڵابوونەوەی گرتەڤیدیۆییەک بڵاوکردەوە و رایانگەیاند کە لێکۆڵینەوە لە رووداوەکە دەکەن. 
    بڵاوی بكه‌نه‌وه‌


     وه‌كو هاوكارییه‌ك بۆ ئێمه‌ رۆژانه‌ 1 جار كلیك بكه‌ له‌

     تۆره‌كانی ماڵپه‌ری شایسته‌ بینه‌رمان بن

    Facebook     Youtube    Instagram    Telegram   Twitter